Gazetari, Valon Syla ka reaguar pas sulmit fizik të mbrëmshëm ndaj tij nga persona ende të paidentifikuar, shkruan Gazeta10.
Syla, ka sqaruar situatën dhe rrethanat në të cilat ndodhi sulmi duke treguar se personat që e sulmuan sipas tij ‘’kishin dukje të islamikëve fanatikë” dhe kjo ndodhi si shkak i reagimeve të tij ndaj “Mulla Mercedesit”.
“Ishim në debat te Lleo në Pressing, dhe sulmuesit na kishin përcjell prej se kemi dale nga ndertesa e T7 duke na u vënë pas me veturë, na gjetën deri te vendi ku jemi ndalur, une Ilir Mirena dhe Leonard Kerquki per takim edhe me disa gazetare te tjere pas debatit. Kete here e kishim zgjedhur kafiterinë Image në Breg të Diellit per tu takuar. Dhe pikërisht para shkalleve duke hy ne lokal u sulmova nga 3 persona, në dukje islamik fanatik. Sulmi me çdo gjase ka të bëjë me reagimet e mia rreth ‘Mulla Mercedesit’ dhe ngjarjeve në BIK, qe duket se nuk ju ka pelqyer fare dhe keshtu ka nxitur ketë komunitet te militanteve islamik të organizojne sulm fizik të paramenduar.”, ka shkruar ai.
Ndërkohë lidhur me autorët gazetari i sulmuar ka thënë se “nuk e di a i ka porositur ndokush, por kjo mjaftoi qe të pësoj lëndime të rënda në kokë, dhe në dorën e majtë.”.
Tutje, Syla ka thënë se ajo çfarë e shqetëson është që ata nuk po arrijnë ta kuptojnë humorin dhe fjalën e lirë.
“Ajo qe me shqetëson personalisht në këtë rast është që reagimet përpos që ishin të faktuara, kishin dhe doza të theksuara të humorit. Dhe kjo nuk po pranohet nga një komunitet islamik qe sillet me tipare mesjetare dhe nuk po arrinë të pranoj humorin dhe fjalen e lirë, shpalos te ata zymtësinë e theksuar te mendimit dhe mentalitetit të tyre. Poashtu tendenca e tyre që dhunshëm të imponohen që të arrijë objektiva të errta dhe fanatike deri në shkeljen e të drejtave më bazike të njeriut, tregon taktikën e tyre kryesore që është frikësimi i masave dhe me sulme sikur ndaj tipave si unë, mundohen ti frikësojnë të gjithë ata që janë në dy mendje.”, ka shkruar Syla.
Syla ka thënë se ky sulm tregon se disa predikues fetarë që nxisin dhunë shpërblehen me mercedesa.
“Kjo tregon se keta predikues fetarë, e hoxhallarë që nxisin dhunë e prodhojnë kesi militantizmi shpërblehen me mercedesa, nga shefat e Bashkësive Fetare, dhe duke i shpërblyer pregaditen të ushtrojnë dhunë dhe frikësim te të gjithë ata që nuk i përcjellin dogmat e tyre.Feha është e rendësishme dhe njerëzimi nuk kishte me arritë këtu ku është pa të mirat e fesë. Poashtu Islami thuhet se nëkupton paqe. Por jo edhe liri. Unë jam Valon Syla dhe jam libertarian me bindje. Mua dhe kosovarëve si unë nuk ju nevojitet paqja, pa liri.”, ka shkruar Syla.
Ai në fund ka bërë thirrje që fjala e lirë të mbrohet./Gazeta10